Detaje të reja kanë dalë në dritë lidhur me rastin e kanosjes së dyshuar të gazetarit Lirim Mehmetaj nga Gani Geci, ndaj të cilit Prokuroria ka kërkuar caktimin e masës së paraburgimit prej një muaji.
Sipas detajeve të publikuara nga dosja e Prokurorisë, Geci dyshohet se kishte shkuar në zyrën e gazetarit Lirim Mehmetaj, ku i kishte kërkuar të ndryshonte një postim.
“Pash një Zot, mos na merr në qafë, ndërro postimin se na duhet me u vra”, janë fjalët që, sipas raportimit mbi dosjen e Prokurorisë, Geci dyshohet t’ia ketë drejtuar Mehmetajt.
Këto deklarata janë pjesë e pretendimeve që lidhen me rastin për të cilin Geci po hetohet nën dyshimin për kryerjen e veprës penale “Kanosja”.
Prokuroria ka kërkuar që ndaj tij të caktohet masa e paraburgimit prej një muaji, ndërsa vendimi për këtë kërkesë i takon gjykatës kompetente.
Rasti ka të bëjë me një përplasje të dyshuar mes Gecit dhe gazetarit Mehmetaj, lidhur me një postim, përmbajtja e të cilit nuk është sqaruar në detajet e publikuara deri më tani.
Pretendimet e Prokurorisë mbeten për t’u shqyrtuar nga organet e drejtësisë.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.