Në Spitalin e Përgjithshëm “Dr. Sami Haxhibeqiri” në Mitrovicë është realizuar me sukses një operacion i rrallë urologjik, gjatë të cilit një pacient 54-vjeçar është trajtuar për tre gurë të mëdhenj në sistemin urinar.
Sipas njoftimit të spitalit, pacienti me inicialet B.S. i është nënshtruar ndërhyrjes kirurgjikale ku janë hequr tre gurë me përmasa të konsiderueshme: një gur në fshikëzën urinare me madhësi rreth 7.5 cm, një gur në ureter me rreth 4 cm, si dhe një gur në veshkë me madhësi 1.5 deri në 2 cm.
Ndërhyrja është kryer nga ekipi i urologëve, kurse nga spitali është bërë e ditur se pas trajtimit dhe periudhës së qëndrimit në repart, pacienti është liruar në gjendje të mirë shëndetësore.