Organizata e Veteranëve të Luftës së UÇK-së (OVL UÇK) ka reaguar sot, në Ditën e Veteranëve të UÇK-së, duke bërë thirrje për “reflektim shtetëror, respekt institucional dhe përulje ndaj sakrificës së atyre që e sollën lirinë”.
Në reagimin e publikuar në Facebook, OVL UÇK thekson se: “Për pesë vite me radhë, ky pushtet e la luftëtarin e UÇK-së pa pension meritor, duke e nënçmuar dinjitetin e atij që rrezikoi jetën për liri. Kjo u bë me vetëdije dhe me hile politike, në bashkëpunim me Listën Serbe.”
Organizata shton: “U toleruan deklarata fyese, përçmuese dhe linçuese ndaj veteranëve të UÇK-së. U lejua që luftëtarët të etiketohen, të poshtërohen dhe të trajtohen si barrë, pa asnjë mbrojtje shtetërore. Madje, u tha publikisht se ‘më mirë të paguheshin mercenarët, sesa ata që e çliruan vendin’. Kjo është një politikë e ftohtë, e qëllimshme dhe e organizuar kundër UÇK-së.”
Sipas OVL UÇK, edhe sot veteranët nuk u kujtuan as simbolikisht nga institucionet: “Asnjë aktivitet shtetëror, asnjë vizitë te varret e dëshmorëve nga institucionet. Kjo heshtje është qëndrim politik. Dhe ky qëndrim tregon se, fatkeqësisht, shteti po përpiqet të shkëputet nga lufta që e solli në jetë.”
Si përfundim, OVL UÇK ua rikujton institucioneve: “Kosova nuk ka lindur nga neutraliteti, as nga administrata, as nga konferencat, por nga gjaku i dëshmorëve dhe sakrifica e veteranëve të UÇK-së.”