Papa Françesku është shfaqur në sheshin e Shën Pjetrit në Vatikan për të uruar “Gëzuar Pashkët” për mijëra besimtarë katolikë.
Papa, 88 vjeç, doli në një karrige me rrota dhe bëri me dorë nga ballkoni i Bazilikës së Shën Pjetrit drejt turmave brohoritëse poshtë.
Dalja e tij ishte pritur me padurim, pas daljes nga spitali muajin e kaluar, pas pesë javësh trajtimi për një infeksion që e çoi në pneumoni të dyfishtë.
Në atë kohë, mjekët thanë se ai do të kishte nevojë për të paktën dy muaj pushim në rezidencën e tij. Para festimeve të së dielës, ai ishte parë dy herë këtë javë në paraqitje publike.
Fjalimi i tij tradicional i Pashkëve u mbajt nga një anëtar klerik.
“Nuk mund të ketë paqe pa lirinë e fesë, lirinë e mendimit, lirinë e shprehjes dhe respektin për pikëpamjet e të tjerëve”, tha anëtari i klerit, ndërsa Papa ishte ulur pranë tij.
Papa, i cili ende po shërohet nga sëmundja, kishte paraqitur “dy episode shumë kritike” ku “jeta e tij ishte në rrezik” ndërsa ishte në spital, sipas një prej mjekëve që u kujdesën për të.
Dhjetëra mijëra katolikë janë mbledhur në Romë për meshën e Pashkëve gjatë këtij viti të veçantë jubilar, i cili zhvillohet çdo 25 vjet, shkruan BBC.