Për herë të parë 25 vite pas luftës, katër komunat në veri të Kosovës: Mitrovica e Veriut, Zveçani, Zubin-Potoku dhe Leposaviqi, sivjet do të fillojnë faturimin e tatimit në pronë.
Këtë lajm e ka bërë të ditur sot ministri i Financave, Punës dhe Transfereve, Hekuran Murati.
Ky proces është një hap i rëndësishëm për integrimin e mëtejmë të këtyre komunave në sistemin administrativ të Republikës së Kosovës, duke krijuar mundësi për zhvillimin e infrastrukturës dhe mbledhjen e të ardhurave për investime lokale.
Pas mbylljes në tërësi të strukturave ilegale në gjithë territorin e Kosovës, vazhdimi i institucionalizimit të shërbimeve në veri të vendit me hapjen e zyrave kadastrale, zyrave për regjistrimin e bizneseve, zyrave pensionale e të punësimit, pagesës së faturave të energjisë elektrike, dhe tash edhe me nisjen e faturimit të tatimit në pronë, ky është një hap thelbësor drejt zhvillimit të qëndrueshëm dhe përmirësimit të kushteve të jetesës për qytetarët atje.