Kryetari i Kuvendit të Kosovës, Dimal Basha, ka marrë pjesë dhe ka mbajtur fjalim në hapjen e Forumit Rinor të RYCO-s, raporton Ekonomia Online.
Në fjalën e tij, Basha theksoi rëndësinë e organizatës dhe rolin e saj në ndërtimin e urave mes të rinjve nga Ballkani Perëndimor.
Ai gjithashtu potencoi rëndësinë e pajtimit dhe bashkëjetesës pas traumave të mëdha që ka përjetuar Kosova.
“Zyra Rajonale për Bashkëpunimin Rinor, RYCO, në sytë e mi është një institucion i jashtëzakonshëm, sepse përfaqëson më shumë sesa një zyrë. Ajo mishëron një vizion – një vizion të pajtimit, bashkëpunimit dhe një të ardhmeje ku të rinjtë nga Shqipëria, Bosnja, Kosova, Mali i Zi, Maqedonia e Veriut dhe Serbia bashkohen, jo si të huaj, por si fqinj të vërtetë dhe partnerë të mirë. Përmes shkëmbimeve rinore dhe dialogut, RYCO ndërton ura që rajoni ynë i ka kërkuar prej kohësh.
Për Kosovën, ky vizion ka një kuptim të thellë. Ashtu si shumë vende të tjera të Ballkanit, edhe ne kemi kaluar trauma të mëdha. Më shumë se 10 mijë civilë u vranë, mes tyre 1,133 fëmijë. Pas gjithë masakrave dhe spastrimeve etnike, sot kemi serbë, turq, boshnjakë, romë, goranë që jetojnë krah shqiptarëve. Kemi komuna si Shtërpca, Peja, Kamenica, Lipjani, Graçanica, Mamusha, ku tregtojnë, punojnë dhe jetojnë në paqe me njëri-tjetrin.
Kjo është dëshmi se, pavarësisht krimeve dhe traumave të përjetuara, populli i Kosovës ka ecur përpara, ku respekti dhe toleranca janë bërë vlera të vërteta. Ato që ka kaluar ky vend janë plagë që nuk shërohen lehtë. E megjithatë, pavarësisht vuajtjeve, populli i Kosovës ka qenë gjithmonë i gatshëm të ofrojë dorën e paqes,” deklaroi Basha.
Ndërsa Sekretari i Përgjithshëm i RYCO-s, Vladimir Obradoviq, theksoi rëndësinë e forumit dhe sfidat me të cilat përballen të rinjtë.
“E ardhmja jonë është drejtësia – jo vetëm në parim, por edhe në praktikë. Ky forum është i bashkuar me ju, të rinjtë e rajonit tonë. Ne kemi dëgjuar zërin tuaj, kudo. Ju na keni treguar çfarë duhet të përfshihet, cilat sfida janë më urgjente dhe si ky forum duhet të lidhë të rinjtë në gjithë rajonin.
Ky forum vjen në një moment kritik për rajonin tonë. Mospërfshirja e të rinjve po rritet në mbarë botën. Është veçanërisht shqetësuese që 1 në 5 të rinj në botë nuk janë në arsim, punësim apo trajnim dhe ndihen të përjashtuar nga mundësitë për të mësuar, për të zhvilluar aftësitë dhe për të fituar përvoja.
Edhe më urgjente është nevoja për trajnim dhe zhvillim aftësish në rajonin tonë. Midis 25 dhe 50 për qind e të rinjve tanë që sot janë në arsim mund të përcaktojnë të ardhmen e rajonit në vitet që vijnë. Kjo hap shumë mundësi për punë më të mira, për studim dhe për ndërtimin e një të ardhmeje më të fortë në rajonin tonë,” theksoi ai.
