Lëvizja Vetëvendosje përgjatë tremujorit të parë të vitit 2025 ka shpenzuar në total 1 milion e 734 mijë e 872 euro.
Gjatë muajit janar, VV-ja pagoi paga të punëtorëve 89 mijë e 934 euro, ndërsa në shkurt, këto shpenzime u rritën për mbi 3 mijë euro, përkatësisht 93 mijë e 16 euro, teksa në mars, për paga VV-ja shpenzoi 88 mijë e 926 euro.
Mbi 27 mijë euro, Vetëvendosja i shpenzoi në udhëtime brenda vendit për tre muajt e parë të vitit, kurse në shpenzime për internet, shpenzime telefonike dhe postar, VV-ja dha 18 mijë e 67 euro.
12 mijë e 471 euro partia që udhëhoqi për katër vjet qeverinë i dha në shërbime teknike gjatë tre muajve të parë, ndërsa shpenzime prej 8 mijë e 749 euro pati edhe në kategorinë “mobilje dhe pajisje me vlerë të vogël deri në 1 mijë euro”.
E, kategoria me shifrën më të lartë të parave të shpenzuara nga Lëvizja Vetëvendosje është ajo e “mallrave dhe shërbimeve”, që në total i kushtoi 604 mijë euro, ku vetëm për akomodim në muajt janar, shkurt dhe mars VV-ja pagoi mbi 304 mijë euro. Ndërsa për ushqim dhe pije për këta tre muaj i dha mbi 257 mijë euro, e për furnizim për zyre pagoi mbi 41 mijë euro.
Për naftë, VV-ja pagoi mbi 111 mijë euro, për shpenzime të marketingut afro gjysmë milioni euro, e për dreka zyrtare mbi 47 mijë euro.