Gështenjat janë një ushqim ideal për këtë periudhë të vitit, të shijshme dhe shumë të shëndetshme. Ato janë të pasura me vitaminë C — gjysmë filxhani gështenja të freskëta sigurojnë rreth 35–45% të nevojës ditore për këtë vitaminë.
Kur i zieni ose i piqni, gështenjat humbasin pak vitaminë C, por mbeten të dobishme. Për të ruajtur më shumë nga kjo vitaminë, rekomandohet pjekja në temperatura të ulëta. Edhe pas gatimit, ato përmbajnë shumë antioksidantë, si acidi galik dhe acidi elagjik, të cilët madje rriten gjatë pjekjes.
Të mirat e gështenjave: Mbrojnë shëndetin e zemrës
Antioksidantët dhe mineralet si magnezi dhe kaliumi ndihmojnë në uljen e rrezikut për sëmundje të zemrës ose goditje në tru. Gështenjat janë një burim i mirë i këtyre lëndëve ushqyese dhe mund të përmirësojnë shëndetin e zemrës.
Përmirësojnë tretjen
Gështenjat janë të pasura me fibër, e cila ndihmon në funksionimin e mirë të zorrëve dhe rritjen e baktereve të dobishme në sistemin tretës. Përveç kësaj, ato nuk përmbajnë gluten, duke i bërë një zgjedhje të shëndetshme për personat me sëmundjen celiake.
Ndihmojnë në kontrollin e sheqerit në gjak
Fibra e gështenjave ndihmon në mbajtjen e niveleve të sheqerit në gjak në ekuilibër. Ushqimet me shumë fibër bëjnë që trupi të përthithë ngadalë niseshtenë, duke shmangur rritjet e menjëhershme të sheqerit, të rrezikshme për personat me diabet. Gështenjat kanë gjithashtu një indeks glicemik të ulët, rreth 54, që do të thotë se nuk shkaktojnë ndryshime të mëdha në nivelin e sheqerit kur konsumohen.