Ish-ambasadori i Kosovës, Petrit Selimi, në emisionin “Forum” në DTV Media, ka bërë deklarata të rënda gjatë diskutimit për zhvillimet politike në Serbi dhe të ardhmen e pushtetit të Aleksandar Vuçiqit.
Selimi ka pretenduar se brenda partisë së Vuçiqit ka persona me të kaluar kriminale, duke përmendur vrasës me pagesë, huliganë dhe struktura paramilitare, si dhe veteranë që, sipas tij, janë angazhuar në konflikte në vende të ndryshme të botës.
Duke folur për sfidat me të cilat mund të përballet pushteti i Vuçiqit, Selimi ka thënë se beteja nuk do të zhvillohet vetëm për rezultatin politik, por edhe për ruajtjen e ndikimit mbi bizneset, mediat dhe prokurorët.
Sipas tij, një nga sfidat kryesore për Vuçiqin do të jetë që këto struktura të mos largohen nga kontrolli i tij, në rast të ndryshimeve politike në Serbi.
Selimi ka përmendur edhe një deklaratë të Vuçiqit, të cilën e interpretoi si mesazh për njerëzit e afërt me pushtetin, duke thënë se presidenti serb u ka përcjellë atyre idenë se nuk duhet të frikësohen, pasi ai do t’i mbrojë.