Policia e Kosovës ka zhvilluar takim informues dhe koordinues me KFOR’in, EULEX’in, përfaqësues të ambasadës amerikane në Kosovë, Zyrën e BE’së dhe të OSBE’së para ditës së shpalljes së aktgjykimit ndaj ish-krerëve të UÇK’së.
Në njoftim thuhet se policia ka ndërmarrë masat e nevojshme për ofrimin e sigurisë dhe ruajtjen e rendit dhe ligjit më 16 shtator, ditën kur pritet të shpallet aktgjykimi ndaj katërshes së UÇK’së.
“Sipas praktikave të mëhershme të ndërtuara, me qëllim të mirëmbajtjes dhe avancimit të partneritetit, kur pritet të ketë zhvillime, aktivitete apo tubime publike, menaxhmenti i PK-së mban takime informuese dhe koordinuese me drejtorët e departamenteve, divizioneve dhe drejtorët e drejtorive rajonale, përfshirë edhe takime me partnerë ndërkombëtarë, si: KFOR, EULEX, përfaqësues nga Ambasada Amerikane, Zyra e BE-së dhe OSBE-ja. Një takim i tillë u mbajt edhe sot në Drejtorinë e Përgjithshme të PK-së, ku u prezantua plani dhe angazhimet policore lidhur me zhvillimet e parapara që ndërlidhen me datën 16 shtator”, thuhet në njoftim.
Policia ka bërë të ditur se mund të ketë kufizime ose ndërprerje të përkohshme të qarkullimit nëpër rrugët e prekura nga aktivitetet që mund të zhvillohen pas aktgjykimit të ish-krerëvë të UÇK’së.
“Policia e Kosovës, sipas detyrës zyrtare dhe legjislacionit në fuqi, do të ofrojë siguri për të gjithë qytetarët pa dallim, si dhe do të angazhohet me njësi policore, në mënyrë që mbarëvajtja e të gjitha aktiviteteve dhe zhvillimeve të mundshme të kalojnë të qeta dhe pa incidente. Varësisht nga aktivitetet dhe zhvillimet e mundshme, mund të ketë kufizime ose ndërprerje të përkohshme të qarkullimit në rrugët e prekura nga aktivitetet, andaj Policia e Kosovës ka paraparë edhe angazhime të njësive policore patrulluese të trafikut, në rast të nevojës për riorientim të trafikut në rrugët alternative”, vijon njoftimi.
Policia e Kosovës iu ka bërë thirrje qytetarëve dhe pjesëmarrësve që të respektojnë udhëzimet e zyrtarëve policorë, të tregojnë kujdes dhe të kontribuojnë që aktivitetet të zhvillohen në mënyrë të qetë dhe të sigurt, pasi planifikimi dhe ndërmarrja e masave të sigurisë në rastet kur pritet të ketë zhvillime, aktivitete, apo pjesëmarrje të madhe të qytetarëve, hartimi dhe implementimi i planeve policore janë pjesë e procedurave të rregullta policore.