Prokuroria Themelore e Prishtinës në bashkëpunim me Policinë e Kosovës ka bastisur sot një lokacion në rrugën “Bajram Bahtiri” në Prishtinë.
Kontrolli është kryer në kuadër të hetimeve që lidhen me rastin e ndodhur me 02 Shtator 2024, në lagjen ‘’Aktash’’ në Prishtinë, ku si pasojë e një incidenti të armatosur kishte mbetur i vrarë një person.
Një person është arrestuar gjatë bastisjes, për veprën penale “Vrasje e rëndë në tentativë”, si dhe “Mbajtja në pronësi, kontroll ose posedim i paautorizuar i armëve”.
Gjatë kontrollit në vendin e ngjarjes është gjetur dhe sekuestruar një armë zjarri e tipit pistoletë, për të cilën dyshohet se mund të jetë përdorur në kryerjen e veprës penale.
Hetimet janë duke vazhduar në koordinim të plotë ndërmjet Prokurorisë dhe Policisë së Kosovës, për zbardhjen e plotë të rrethanave të kësaj ngjarje.