Deputeti i partisë serbe të Kosovës, “Për Liri, Drejtësi dhe Mbijetesë”, Nenad Rashiq, nuk ka shprehur gatishmëri që të njohë shtetin e Kosovës, në rast se një ditë ai do të bëhej president i Serbisë.
Në televizionin “Dukagjini”, ai u pyet për një skenar hipotetik kur në të ardhmen do të bëhej kreu i shtetit serb, se a do ta njihte shtetësinë e Kosovës.
“Nuk e di, tash kjo është pyetje retorike, por në rolin që e kam këtu… dhe pastaj, është pyetje interesante me të vërtetë se çka do të kisha bërë atëherë, edhe pse ju kuptoni që në këtë moment, presidenti i Serbisë e ka për detyrë ta mbrojë Kushtetutën, ku në preambulë… jam larg, dhe shyqyr që jam larg që të bëhem president i Serbisë”, tha fillimisht Rashiq, transmeton Klankosova.tv.
Por, moderatori insiston që të marrë një përgjigje konkrete, duke e pyetur sërish se nëse do të ishte krejtësisht e afërt mundësia për t’u bërë president i Serbisë, “a do ta kishe njohur pavarësinë e Republikës së Kosovës?”.
“Nuk e di, nuk e di. Nuk e kam analizuar kurrë këtë ide, por herën [intervistën] tjetër ndoshta…”, u përgjigj deputeti Rashiq.
Kujtojmë se Rashiq është kandidat për nënkryetar të Kuvendit, post për të cilin partia e Albin Kurtit, Vetëvendosja, po insiston që t’i takojë pikërisht deputetit të partisë “Për liri, drejtësi dhe mbijetesë”.