Policia e Kosovës u ka bërë thirrje qytetarëve që të tregojnë kujdes të shtuar gjatë pjesëmarrjes në trafik, veçanërisht në ditët kur ka reshje shiu, mjegull dhe rrugë të lagështa.
Përmes një fotografie të publikuar në Facebook, Policia ka përcjellë disa udhëzime për ngasësit, duke apeluar për respektimin e rregullave të trafikut dhe përshtatjen e sjelljes gjatë ngasjes me kushtet atmosferike.
“Mjegulla, shiu dhe rrugët e lagështa kërkojnë kujdes të shtuar. Gjatë gjithë këtij sezoni, ndryshimi i motit kërkon ndryshim të sjelljes në timon”, thuhet, ndër të tjera, në apelin e Policisë së Kosovës.
