Ministrja në detyrë e Ekonomisë, Artane Rizvanolli, në një konferencë për media ka hedhur poshtë pretendimet për kolaps energjetik në vend, si dhe raportimet se Korporata Energjetike e Kosovës (KEK) nuk ka prodhuar fare energji në disa periudha, raporton Ekonomia Online.
Ajo tha se, ndonëse sektori energjetik në Kosovë përballet me sfida për shkak të varësisë nga termocentralet e vjetra 42 dhe 62-vjeçare, nuk ka pasur asnjë moment kur KEK-u ka prodhuar zero megavat-orë.
“Dua të adresoj disa dezinformata që kanë qarkulluar ditëve të fundit. Nuk ka pasur asnjë moment kur KEK-u ka prodhuar zero megavat-orë, apo që Kosova ka qenë në ndonjë kolaps energjetik, siç është raportuar nga disa media. Ne përballemi me sfida në sektorin energjetik sepse siguria jonë e furnizimit varet nga termocentralet 62 dhe 42-vjeçare, për të cilat nuk janë bërë asnjëherë rehabilitime serioze. Një nga arsyet pse që nga prilli nuk i kemi në funksion të gjitha blloqet është sepse, për herë të parë në termocentralin Kosova B, po i modernizojmë turbinat. Si rezultat, blloku B2 është jashtë funksionit për rreth gjashtë muaj për të mundësuar këto operime”, theksoi Rizvanolli.
“Kjo është një sakrificë e përkohshme, por e domosdoshme, dhe duhet ta bëjmë tani, sepse nuk është bërë me kohë – kur çmimet e importit kanë qenë trefish më të ulëta. Po thuhet, ndër të tjera, se këto janë remontet e rregullta që po bëhen në termocentralin Kosova B dhe që janë bërë gjithmonë – kjo nuk është e saktë. Këto po bëhen për herë të parë. Janë bërë vetëm intervenime të vogla, qindra tenderë që kanë kushtuar në total mbi 1 miliard euro dhe që kanë shkuar në termocentralet tona, mirëpo kurrë nuk janë bërë rehabilitime dhe modernizime siç kemi filluar tani,” shtoi ajo.