Kryetari i PDK’së, Memli Krasniqi, ka reaguar pas vendimeve që mori sot Qeveria në detyrë, ku e miratoi projektbuxhetin për vitin 2026, rriti pagën mimimale, pensionet dhe shtesat për fëmijë.
Krasniqi ka thënë se vendimet u morën për blerjen e votave për balotazh dhe zgjedhje parlamentare, teksa e ka cilësuar këtë si “thes të mashtrimeve të një “babadimri”.
Ai ka thënë se ato që u thanë sot do të bëhen, por jo me Albin Kurtin në Qeveri.
“Thesi i mashtrimeve të një “babadimri” që kurrë s’erdhi për qytetarët e Kosovës, sado që premtoi çdo vit për pesë vjet, s’mundet me e rikthy besimin e humbur te qytetarëve e as nuk mund te arrijë qëllimin e blerjës së votës për balotazh dhe për zgjedhje parlamentare. Krejt ato që sot u thanë në mbledhjen e fundit të kësaj qeverie, e që s’u bënë pesë vjet me radhë, do të bëhen: më mirë, më shumë e më shpejt, por me qeverinë e ardhshme, pa Albin Kurtin e pa Vetëvendosjen. Mashtrimi elektoral nuk kalon. Uji i turbullt s’pihet dy herë!”, ka shkruar Krasniqi.