Analisti i politikave në Institutin GAP, Bekim Salihu, ka reaguar pas deklaratave të fundit të kryeministrit në detyrë, Albin Kurti, duke theksuar se shefi i ekzekutivit nuk ka kompetencë ligjore për të vlerësuar performancën e komunave apo për të shpërndarë buxhetin bazuar në preferenca personale.
Sipas Salihut, gjuha e përdorur nga kryeministri cenon autonominë komunale, duke krijuar perceptimin e gabuar se komunat janë të varura nga niveli qendror.
Ai theksoi se një qasje e tillë tejkalon mandatin kushtetues të kryeministrit, pasi “merr rolin e hetuesit dhe prokurorit”, në vend se të nxisë bashkëpunim institucional.
“Kjo qasje nuk është bashkëpunuese apo mbështetëse, por në të kundërt, nxit ndarje dhe pakënaqësi”, ka deklaruar Salihu.
Duke iu referuar të dhënave zyrtare, analisti i GAP-it tha se komunat kanë performuar më mirë se qeveria qendrore pothuajse në të gjitha fushat, përfshirë investimet kapitale, menaxhimin e kontratave të prokurimit dhe transparencën financiare.
Sipas tij, rezultatet tregojnë qartë se pushteti lokal po arrin standarde më të larta të qeverisjes dhe se ndërhyrjet politike nga niveli qendror rrezikojnë ta dëmtojnë këtë performancë.