Ushtria amerikane ka nisur një valë të re sulmesh ndaj objektivave në Iran, duke deklaruar se synimi ishte dobësimi i aftësive të Teheranit për të sulmuar anijet në Ngushticën e Hormuzit.
Operacioni i fundit vjen pasi presidenti amerikan Donald Trump paralajmëroi hakmarrje pas vdekjes së ushtarëve amerikanë në rajon. Sipas Komandës Qendrore të SHBA-së (CENTCOM), sulmet kanë goditur qendra komanduese ushtarake, kapacitete detare, sisteme të mbrojtjes ajrore, si dhe pika të lidhura me raketa dhe dronë.
Nga ana tjetër, Irani ka deklaruar se ka kryer kundërpërgjigje ndaj objektivave amerikane dhe ka pretenduar sulme ndaj dy anijeve cisternë në Ngushticën e Hormuzit, si dhe ndaj bazave amerikane në disa vende të rajonit.
Presidenti iranian Masoud Pezeshkian e ka cilësuar situatën si një “luftë në shkallë të plotë” me Shtetet e Bashkuara, ndërsa përplasjet mes dy vendeve kanë rritur shqetësimet për sigurinë e një prej rrugëve më të rëndësishme të transportit të naftës në botë.
Ndërkohë, autoritetet ndërkombëtare kanë raportuar për shpërthime në disa zona të Iranit, ndërsa një numër i kufizuar anijesh tregtare kanë vazhduar lundrimin nëpër Ngushticën e Hormuzit.
Tensionet në Lindjen e Mesme mbeten në nivel të lartë, me frikën se përplasjet ushtarake mund të përshkallëzohen më tej.