Presidentja e Kosovës, Justina Shiroka-Pula, ka uruar Akademinë e Shkencave të Shqipërisë me rastin e 54-vjetorit të themelimit, duke vlerësuar kontributin e saj në zhvillimin e shkencës dhe ruajtjen e trashëgimisë kombëtare shqiptare.
Në mesazhin e urimit, Shiroka-Pula ka theksuar se Akademia, që nga themelimi nën drejtimin e profesor Aleks Budës e deri te udhëheqja aktuale nga Skënder Gjinushi, ka qenë një institucion i rëndësishëm i dijes, kërkimit shkencor dhe mbrojtjes së trashëgimisë kombëtare.
Ajo ka vlerësuar se gjatë 54 vjetëve të veprimtarisë, Akademia ka mbetur një nga shtyllat e identitetit intelektual shqiptar, duke ndërthurur ruajtjen e trashëgimisë me zhvillimin e shkencës, inovacionit dhe qëndrueshmërisë.
Sipas presidentes, roli i këtij institucioni është veçanërisht i rëndësishëm në një kohë kur shoqëria shqiptare në Kosovë dhe Shqipëri përballet me ndryshime të thella dhe ka nevojë të shtuar për dije dhe ekspertizë.
“Për ne, shqiptarët e Kosovës, ky institucion ka qenë dhe mbetet një referencë e rëndësishme e dijes dhe e krenarisë kombëtare”, thuhet në urimin e Shiroka-Pulës.
Presidentja ka shprehur gjithashtu dëshirën që Akademia të vazhdojë të jetë një hapësirë e hapur e dijes, ku studiuesit e rinj gjejnë frymëzim dhe ku Shqipëria e Kosova përfaqësohen denjësisht në botën e shkencës dhe kulturës.
Në fund, ajo i ka uruar institucionit suksese të mëtejshme, botime të reja shkencore, projekte kërkimore dhe bashkëpunime ndërkombëtare që kontribuojnë në forcimin e shkencës shqiptare.