Shitjet e makinave elektrike Tesla kanë rënë sërish në të gjithë Evropën muajin e kaluar, duke vazhduar një vit tejet të vështirë për kompaninë, shkruan The Guardian.
Sipas të dhënave të publikuara nga Shoqata Evropiane e Prodhuesve të Automjeteve (ACEA), regjistrimet e Tesla në Bashkimin Evropian ranë me 34.2 për qind në nëntor, krahasuar me të njëjtën periudhë të vitit të kaluar, ndërsa në hapësirën më të gjerë që përfshin BE-në, Britaninë dhe vendet e EFTA-s (Shoqata Evropiane e Tregtisë së Lirë), rënia ishte 11.8 për qind.
Gjatë muajit nëntor, Tesla shiti 12,130 automjete në BE, nga 18,430 sa kishte shitur në nëntor të vitit 2024, duke bërë që pjesa e saj në treg të bjerë nga 2.1 për qind në 1.4 për qind.
Rënia e shitjeve të Tesla në Evropë lidhet edhe me reagimin negativ të konsumatorëve ndaj aktivizmit politik të shefit të kompanisë, Elon Musk, në Shtëpinë e Bardhë të Donald Trump, përpara se raportet mes tyre të përkeqësoheshin. Krahas kësaj, Tesla po përballet me konkurrencë gjithnjë e më të fortë nga rivalët, veçanërisht nga prodhuesit kinezë si BYD, i cili pati një muaj nëntor shumë të suksesshëm.
BYD rriti shitjet në BE, EFTA dhe Mbretërinë e Bashkuar me 221 për qind, duke kaluar nga 6,568 automjete në 21,133 njësi të shitura. Kompania kineze është një nga disa prodhues që po shfrytëzojnë tranzicionin drejt makinave elektrike për të fituar dominim në tregun global të automobilëve, me mbështetje të fortë nga qeveria e Pekinit dhe autoritetet rajonale.
Ndërkohë, pavarësisht vështirësive të Tesla, tregu i përgjithshëm i makinave elektrike në Evropë ka shënuar rritje. Gjatë 11 muajve të parë të vitit 2025, automjetet plotësisht elektrike përbënin 16.9 për qind të tregut të BE-së, nga 13.4 për qind në të njëjtën periudhë të vitit 2024.