Në Rahovec u mbajt ora letrare-përkujtimore kushtuar jetës dhe veprës së profesorit e shkrimtarit të njohur Miftar Kryeziu, në të cilën morën pjesë familjarë, kolegë, nxënës e bashkëpunëtorë të tij.
Në këtë ngjarje, kandidati për kryetar të Komunës së Rahovecit nga AAK, Smajl Latifi, mbajti një fjalim përkujtimor ku vlerësoi lart figurën dhe kontributin e profesorit Kryeziu në arsim, letërsi dhe kujtesën kolektive të komunitetit.
“Një shoqëri që vlerëson, kujton e nderon jetën dhe veprat e njerëzve që lënë gjurmë, është shoqëri e civilizuar. Miftar Kryeziu, me angazhimin, përkushtimin dhe qëndrimin e tij ndaj vlerave tona kombëtare, është bërë pjesë e kujtesës sonë kolektive,” theksoi Latifi.
Ai shtoi se profesori Kryeziu ishte shembull i ekuilibrit, moralit dhe përkushtimit, që fitoi respektin e nxënësve, kolegëve dhe komunitetit krijues.
“Miftari me penën dhe veprën e tij u bë pjesë e plejadës së krijuesve që e pasurojnë identitetin tonë kulturor pas një periudhe të vështirë historike. Ai e përjetësoi në art dhe letërsi luftën, sakrificën dhe idealin e lirisë,” u shpreh Latifi.
Në fund të fjalimit, ai bëri thirrje që kujtimi për profesorin të ruhet me krenari dhe nderim, duke vijuar rrugën e tij të përkushtimit dhe dinjitetit njerëzor.
“Qoftë i paharruar kujtimi e nderimi për profesorin e shkrimtarin Miftar Kryeziu,” përfundoi Latifi.