Takimi i partive politike me presidenten e vendit, Vjosa Osmani nuk solli ndonjë rezultat konkret lidhur me përpjekjet për krijimin e qeverisë së re.
Partitë opozitare në mungesë të numrave nuk propozuan mandatar në këtë takim, duke kërkuar nga presidentja që të shpallë zgjedhjet e jashtëzakonshme.
Nga ana tjetër, partia fituese e zgjedhjeve, Lëvizja Vetëvendosje ka lënë të kuptohet se do të bëjë edhe një përpjekje tjetër për dërgimin e një mandatari të ri për formimin e qeverisë.
Profesori i Shkencave Politike, Nexhmedin Spahiu, në një deklaratë ka thënë se balotazhi do të jetë përcaktues për zhvillimet politike të ardhshme.
“Besoj që do të shkojmë drejt zgjedhjeve. Për shkak të balotazhit kjo është vetëm një manovër për të fituar pak kohë, derisa të dihet rezultati i tij. Sepse rezultati i balotazhit tregon se si mund të jetë edhe rezultati i zgjedhjeve në nivel kombëtar”, ka thënë Spahiu.
Sipas tij, nëse Vetëvendosje fiton në gjysmën e 12 komunave ku garon, do të motivohet për të shkuar menjëherë në zgjedhje, e në rast të kundërt mund të përpiqet të formojë qeverinë pa zgjedhje të reja.
“Nëse i humb të gjitha, atëherë do të përpiqet që të bëjë një qeveri pa shkuar në zgjedhje,” ka thënë Spahiu.
Ai parashikon se Vetëvendosje mund të caktojë një mandatar të ri për të fituar kohë deri pas balotazhit, dhe më pas, varësisht nga rezultati të vendosë nëse do të shkojë në zgjedhje apo të kërkojë ndonjë kompromis politik.