Nëntë persona kanë mbetur të lënduar si pasojë e një aksidenti në komunikacion që ka ndodhur në fshatin Korenicë të Gjakovës, ku janë përfshirë dy automjete.
Sipas njoftimit të Spitalit të Përgjithshëm “Isa Grezda” në Gjakovë, rreth orës 14:00 në Shërbimin Emergjent janë pranuar nëntë pacientë, të cilëve u është ofruar menjëherë ndihma mjekësore.
Spitali bën të ditur se janë kryer të gjitha ekzaminimet dhe trajtimet e nevojshme, përfshirë ekzaminimet imazherike (RTG dhe CT), analizat laboratorike, si dhe konsultimet me specialistët përkatës.
Sipas mjekëve, gjendja e të gjithë pacientëve është stabile.
Pas trajtimit:
Pesë pacientë janë pranuar për trajtim spitalor.
Katër pacientë janë liruar për trajtim në shtëpi, pasi kanë marrë kujdesin e nevojshëm mjekësor.
Spitali i Përgjithshëm “Isa Grezda” u ka bërë thirrje të gjithë pjesëmarrësve në komunikacion që të respektojnë rregullat e trafikut dhe të vozisin me kujdes, duke theksuar se respektimi i tyre është mënyra më e mirë për të mbrojtur jetën dhe shëndetin e qytetarëve.