Ivana Stradner, Fondacioni për Mbrojtjen e Demokrasië, ka folur në lidhje me çarjen në Boshtin Transatlantik, pas përplasjeve të fundit në mes ShBA-së dhe BE-së.
Në një prononcim për Radio Evropa e Lirë, Stradner beson që Rusia synon përshkallëzimin e Bosnjës dhe Hercegovinës.
“Për shkak të grupeve të ndryshme fetare dhe etnike, kjo krijon një pikë fërkimi, që Rusia mund ta shfrytëzojë për të përshkallëzuar krizën me ndihmën edhe të udhëheqësit serb Milorad Dodik dhe më pas për ta qetësuar situatën. Këtë do ta përdorte si kartë për të negociuar, duke i thënë Perëndimit se nëse nuk do që konflikti të përhapet më tej, ai duhet të negociojë me Rusinë” – tha Stradner për REL.
Tutje, Stradner ka komentuar edhe situatën në Kosovë, duke e vlerësuar situatën e sigurisë si më të mirë se disa vite më parë.
“Besoj që situata në Kosovë sa i përket sigurisë është më e mirë sesa disa vite më parë dhe gjëja e fundit që duan tani ShBA-ja është një përshkallëzim i pakontrolluar…Kosova duhet të zhvillojë lidhje shumë më të ngushta me BE-në dhe të jetë shumë diplomatike dhe e mencur me qasjen e saj me ShBA-në” – tha Stradner.