Ish-konsulli i Kosovës në Kanada, Donat Syla, ka thënë se në seancën e nesërme konstituive, topi është te opozita.
Syla tha se opozita duhet ta votojë kryetarin e kuvendit këdo që e propozon VV-ja, sepse sipas tij, kjo është forma e vetme për ta konsumuar të drejtën kreu i kësaj partie, Albin Kurti, për ta mandatuar kandidatin për kryeministër.
“Për mua ngre pikëpyetje të mëdha ky mosveprim i opozitës në përgjithësi, sepse nëse pritet kështu në vazhdimësi pa e pasur një vizion të qartë se ku duan ta hedhin hapin tjetër, atëherë ngre dilema që cdo ditë që shkon më tutje, ka mundësi potenciale që ndokush nga deputetët e opozitës së djeshme të kalojë në krahun e VV-së”.
“Unë e di që deputetë të caktuar kanë kontaktuar në vazhdimësi deputetë të subjekteve të tjera dhe të cilëve iu kërkojnë që për hir të miqësisë dhe raporteve që ta votojnë të paktën vetëm kryetarin e kuvendit”, tha Syla.
Tutje, ai tha se duke e ditur që edhe kurti edhe Limaj s’i kanë votat e mjaftueshme për ta zgjedhur kryetarin e kuvendit, ata vetëm e konsumojnë 48-orëshin për thirrjen e seancave konstituive.