Një ngjarje e rëndë ka tronditur Spanjën, ku tre djem të mitur kanë humbur jetën në një plazh pranë qytetit Tarragona, në rajonin e Katalonjës.
Sipas mediave spanjolle, tragjedia ndodhi të premten, kur një grup prej gjashtë të rinjsh u hodhën në det nga shkëmbinjtë, pavarësisht kushteve jo të favorshme të detit. Në zonë ishte vendosur flamuri i verdhë, që paralajmëronte rrezik për shkak të dallgëve të larta.
Tre nga djemtë arritën të dalin vetë në breg, ndërsa tre të tjerët u nxorën nga uji nga ekipet e shpëtimit. Njëri prej tyre, një 12-vjeçar, u shpall i vdekur në vendngjarje, ndërsa dy shokët e tij 13-vjeçarë u transportuan me urgjencë në spital, por nuk arritën t’u mbijetonin plagëve.
Pas ngjarjes tragjike, presidenti i Katalonjës, Salvador Illa, shprehu ngushëllimet për familjet e viktimave, duke e cilësuar rastin si një humbje të rëndë dhe të dhimbshme.
Autoritetet lokale në Tarragona kanë shpallur tri ditë zie, ndërsa kanë përsëritur thirrjet për kujdes maksimal në zonat bregdetare dhe shmangien e hedhjeve nga shkëmbinjtë në det.