Kryeshefi Ekzekutiv i Trepça Sh.A. ka marrë vendim për largimin e përkohshëm nga puna të dy punonjësve të Njësisë Biznesore “Minierat me Flotacion Kishnicë dhe Artanë”.
Sipas njoftimit të Trepçës, vendimi me numër protokolli 7134 është nxjerrë më 10 gusht 2026 dhe prek punonjësit me inicialet Z.R. dhe H.K.
Dy punonjësit janë larguar përkohësisht nga puna duke filluar nga 10 gushti, deri në marrjen e një vendimi nga Komisioni Disiplinor.
Sipas Trepçës, ndaj tyre ekzistojnë dyshime të bazuara se kanë vepruar në kundërshtim me autorizimet e dhëna, duke organizuar transportimin e xehes jashtë orarit të rregullt të punës.
Për këtë arsye, sipas ndërmarrjes, ekziston dyshimi për kryerjen e shkeljeve të rënda të detyrave të punës, të përcaktuara me nenin 10, paragrafët 1.1, 1.3 dhe 1.9 të Rregullores për Përgjegjësinë Disiplinore dhe Materiale të Punonjësve të Trepça Sh.A.
Rasti pritet të trajtohet nga Komisioni Disiplinor, i cili do të marrë vendimin përfundimtar lidhur me përgjegjësinë e dy punonjësve.