Një i dyshuar për vrasjen e aktivistit konservator Charlie Kirk, që ndodhi në një universitet në Utah është arrestuar, ka njoftuar presidenti i SHBA-së, Donald Trump, të premten
Trump e quajti vrasjen një “atentat të tmerrshëm”.
“Mendoj se e kemi kapur autorin”, tha Trump për Fox News, duke shtuar se një person që njihte të dyshuarin e kishte raportuar në polici.
Kirk u qëllua për vdekje nga një snajper të mërkurën, gjatë një aktiviteti që po zhvillonte në Universitetin Utah Valley në qytetin Orem.
Snajperi kishte qëlluar vetëm një herë duke e goditur aktivistin Kirk në qafë.
Charlie Kirk ishte një autor, drejtues podcasti dhe aleat i ngushtë i Donald Trumpit.
Ai kishte ndihmuar në rritjen e mbështetjes së Partisë Republikane tek të rinjtë.
Sipas FBI-së dhe autoriteteve lokale, vrasësi kishte arritur në kampusin e universitetit disa minuta para fillimit të aktivitetit.
Aktiviteti ishte një debat me temën “Prove Me Wrong”, ku merrnin pjesë rreth 3.000 njerëz.
Kirk ishte duke iu përgjigjur një pyetjeje nga publiku në lidhje me sulmet me armë, kur u qëllua për vdekje.
Ai ishte i njohur si mbrojtës i fortë i të drejtës për mbajtjen e armëve.