Kryetarja e Kuvendit, Albulena Haxhiu, ka reaguar pas vrasjes së Arlinda Zekajt, duke bërë të ditur se do të kërkojë që komisionet parlamentare të shqyrtojnë funksionimin e mekanizmave për mbrojtjen nga dhuna në familje.
Haxhiu me anë të një postimi në ‘Facebook’ ka potencuar kërkesën e së ndjerës në drejtim të Prokurorisë së Pejës për trajtim urgjent të rastit të saj, shkruan Insajderi.
“Këto rrethana kërkojnë hetim të plotë. Kur një femicid ndodh pasi viktima ka kërkuar mbrojtje, hetimi duhet të shkojë përtej vrasjes dhe të përfshijë mënyrën se si janë trajtuar denoncimet e saj, si është vlerësuar rreziku dhe çfarë masash janë ndërmarrë për mbrojtjen e saj. Duhet të sqarohet çdo veprim dhe mosveprim i mundshëm institucional dhe, aty ku vërtetohen shkelje, të përcaktohet përgjegjësia përkatëse”, ka thënë ajo.
“Në kuadër të përgjegjësive mbikëqyrëse të Kuvendit, do të kërkoj që komisionet përkatëse parlamentare të shqyrtojnë funksionimin e mekanizmave për mbrojtjen nga dhuna në familje dhe parandalimin e femicidit, me theks të veçantë te vlerësimi i rrezikut dhe bashkërendimi ndërinstitucional. Është përgjegjësia jonë të sigurohemi që ligjet që miratojmë të zbatohen dhe që mangësitë të trajtohen para se të kushtojnë jetë të tjera”, thuhet ndër të tjera në shkrimin e Haxhiut.