Arrestimi i 15 personave në një operacion masiv të autoriteteve ligjzbatuese kosovare të enjten në mëngjes, lidhet direkt me aferën më të madhe të dekadës në sektorin e sigurimeve.
Në mesin e të arrestuarve, siç kanë raportuar mediat, janë dy ish-udhëheqësit e Byrosë Kosovare të Sigurimeve: ish-drejtori gjeneral Sami Mazreku dhe ish-drejtori financiar Valon Berisha.
Të dy dyshohen se përfituan paligjshëm përmes një skeme të mashtrimit të kompanive të sigurimit për të nxjerrë para.
Dëmi i shkaktuar vlerësohet të jetë rreth një milion euro.
Hetimet penale nisën sipas një kallëzimi penal të deponuar në Policinë e Kosovës nga pasardhësit e Mazrekut dhe Berishës në BKS.
Berisha, në një deklaratë dërguar BKS-së vitin e kaluar, derisa ndodhej nën hetime penale nga Prokuroria, e mori përsipër fajësinë eventuale të keqpërdorimit të financave të Byrosë.
Ai, në këtë letër që mban datën 10 mars, 2025, i tha BKS-së se asnjë punonjës tjetër nuk duhet të mbahet përgjegjës për financat e BKS-së. Tha se ato i ka menaxhuar vet ekskluzivisht.
“Unë, Valon Rexhep Berisha, përmes kësaj deklarate dëshmoj se gjatë periudhës së ushtrimit të detyrës sime në Byro si Drejtor i Financave dhe Kontabilitetitkam pasur kompetenca të plota dhe të pavarura në menaxhimin e çështjeve financiare të Byrosë Kosovare të Sigurimeve”, thuhet në letrën e Berishës, dërguar BKS-së.
“Çdo vendim apo keqpërdorim eventual që ka ndodhur gjatë kohës së ushtrimit të funksionit tim ka qenë përgjegjësi e imja dhe nuk ka pasur asnjë lidhje me personat e tjerë në Byro, të cilët nuk kanë qenë të informuar apo të përfshirë në këto procese”.
Në të njëjtën ditë, Berisha i propozoi BKS-së lidhjen e një ujdie për kthimin e mjeteve që dyshohet se i kishte keqpërdorur në periudhën 2022-2023.
Sipas propozimit, ai do të fillonte të kthente mjetet e dëmit të shkaktuar duke filluar nga një pagesë në vlerë 100 mijë euro e këstit të parë.
BKS-ja nuk e ka pranuar marrëveshjen.
Pa u mbushur një vit nga propozimi, Prokuroria e Prizrenit urdhëroi mëngjesin e të enjtes bastisje në disa lokacione që rezultuan me arrestimin e Berishës, ish-shefit të tij, Mazrekut dhe 38 të tjerëve.