Ambasadori i Kosovës për marrëdhënie me NATO-n, Astrit Zemaj, ka reaguar ndaj deklaratave të Ivica Daçiqit, i cili më 7 tetor, në Rashkë të Serbisë, tha se “herët a vonë flamuri serb do të valojë mbi Prizren”.
Daçiq, në deklaratën e tij, përsëriti pretendimet se Kosova nuk do të jetë kurrë e pavarur.
Zemaj i ka cilësuar këto deklarata si gjuhë nacionaliste kërcënuese, që sipas tij, vënë në pikëpyetje realitetin shtetëror të Kosovës dhe rrezikojnë sigurinë rajonale.
Ai ka vlerësuar se një retorikë e tillë i përket epokës së Slobodan Millosheviqit, kur nacionalizmi agresiv serb u shoqërua me luftëra, shkatërrime dhe katastrofë humanitare në Ballkan.
“Ne do të jemi këtu. Republika e Kosovës do të jetë këtu, për dallim nga Serbia që është proksi i Rusisë në Ballkan, vendi ynë është rreshtuar përkrah Shteteve të Bashkuara të Amerikës, NATO-s, Bashkimit Evropian dhe aleatëve tanë”, ka shkruar Zemaj.
Ai ka theksuar se Kosova do të vazhdojë të jetë partnere në mbrojtjen e paqes, lirisë dhe stabilitetit në vend dhe në këtë pjesë të Evropës.