Pas një takimi me Komisionin Qendror të Zgjedhjeve (KQZ), KEDS ka përmbyllur planin operativ për furnizimin pa ndërprerje me energji elektrike gjatë zgjedhjeve të parakohshme parlamentare, të cilat do të zhvillohen më 28 dhjetor 2025 në të gjitha vendvotimet e Republikës së Kosovës.
Nëpërmjet një njoftimi, KEDS ka bërë të ditur se do të angazhohen gjithsej 1,049 punëtorë, të organizuar në 140 ekipe në mbarë vendin, për të siguruar një furnizim të pandërprerë me energji.
“Kjo masë e veçantë përfshin angazhimin e ekipeve teknike në secilin nga 949 vendvotimet, ku do të jetë i disponueshëm një ekip për intervenim të shpejtë në rast të ndonjë problemi të mundshëm. Po ashtu, do të funksionojë një komision qendror teknik për monitorim dhe koordinim në kohë reale, ndërsa ekipet teknike do të jenë në gatishmëri të plotë gjatë gjithë ditës së votimit. KEDS do të sigurojë gjithashtu kapacitetin e plotë logjistik dhe mbështetje IT për mbarëvajtjen e procesit zgjedhor”, thuhet në njoftim.
KEDS theksoi angazhimin e saj për të siguruar kushte optimale për furnizimin e qëndrueshëm me energji elektrike dhe për të kontribuar në zhvillimin normal të procesit zgjedhor, duke siguruar një ditë zgjedhore pa pengesa për qytetarët dhe institucionet.