Një grua është raportuar e zhdukur në Mitrovicën e Veriut, ndërsa autoritetet kanë nisur hetimet për gjetjen e saj.
Sipas burimeve të Sinjalit, bëhet fjalë për Suzana Milosavleviq, e cila banonte në një apartament në rrugën “Xhon Kenedi”.
Denoncimi është bërë më 29 mars 2026 rreth orës 19:50 nga vajza e saj, Milica Kostiq, e cila ka deklaruar se nëna e saj kishte dalë nga banesa më 28 mars rreth orës 07:00 të mëngjesit dhe që nga ajo kohë nuk është kthyer më dhe nuk ka pasur asnjë kontakt me familjen.
Fillimisht, sipas procedurave, është pritur një afat prej 24 orësh për të parë nëse personi do të rikthehej apo do të kontaktonte me familjarët.
Megjithatë, pas kalimit të këtij afati dhe mungesës së çdo informacioni për vendndodhjen e saj, Prokurori i Shtetit ka udhëzuar që rasti të regjistrohet zyrtarisht si “Person i zhdukur”.
Autoritetet janë në kërkim të saj dhe po ndërmarrin veprimet e nevojshme për zbardhjen e rrethanave të zhdukjes.